Albisteak

Gatazka Aralarren
Natur parkearen bihotzean pistak egiteko obren hasierak zalaparta bizia sortu du

2016/10/31
Aitor Salaberria Oiartzabal
Iruzkinik ez
bisita

 Enirio-Aralar mankomunitateak argi berdea eman bezain pronto sartu dira hondeamakinak natur parkean mendi pistak egitera. Artzainen irisgarritasuna hobetzera datoz zazpi kilometroko bide nagusia eta bertatik bordetarainoko besoak. 

      

 


Gatazka Aralarren
Aralarko goi mendietako larreak

     Aralar Bizirik eta ENBA nekazal sindikatuak sare sozialetan daramaten borrokak hedabideetara salto egin du. Honi esker, pistaren aldeko zein aurkako taldeen esanak iritzi publikora iristen ari dira.        

      Proiektuaren eraikuntza ganaduzaleen aspaldiko eskaera bat asetzera dator. Euskal Nekazarien Batasuna (ENBA) sindikatuaren bueltako artzainen arabera, sektorearen gainbeherari aurre egiteko erraztasunak jarri behar zaizkie euren ofizioa baldintza duinetan egiteko. Gainera, Aralarko biodibertsiatearen iturri nagusitzat jotzen dute artzainen larreen kudeaketa. Mankomunitateko lantaldean parte hartu duen Josu Oiartzabal artzainaren arabera, lan baldintza duinerako bidea izateaz gain, pistek gazta mendian egitea baimenduko lukete, horrek dakarren balio erantsiarekin. 

       Aloña Jauregi Landarlan ingurumen taldeko kidearentzat, berriz, natur parke barruan horrelako eraikuntza astakeria da. Irisgarritasunak artzaintzaren gainbeherarekin zerikusirik ez duela ziurtatzen du, obraren justifikazioa errefusatuz. Aralar Bizirik kolektiboan bildutakoen arabera, proiektuak dakartzan kalteak ugariak dira: erosioa, uren kutsadura, masifikazioa... Orain arte, kontserbazionistak batean eta artzainak bestean ageri dira. Hala ere, Arkamurka taldeko Martxel Aizpuruak banaketa artifizialtzat jotzen du hau, izan ere, bateragarritasuna bilatu behar omen da ustiapena, jasangarritasuna eta kontserbazioaren artean.

       Bi taldeen erdian, bitartekari lanak egiteari uko eginez Gipuzkoako Foru Aldundia aurkitzen da, zeinak ez duen orain arte bederen auzian sartu nahi izan. Makomunitatearen erabakia izan dela dio, eta interbentzio guztiak KBEari dagokion babesera egokituak izan direla. 

       Laburbilduz, eraikuntza lanek aurrera darraiten bitartean, auziak soka luzea ekarriko du, sare sozialetan burutzen ari diren bideo zein mezuen norgehiagokak erakusten duen bezala. 

 

 

Iturria: Eitb.eus

Estekak

Aralar Bizirik Facebook
ENBA Facebook

Leave a comment

Please login to leave a comment.

Erregistra zaitez

Erregistra zaitez!

· Parte hartu edukiak hornitzen eta eztabaidatzen 
 
· Igo itzazu argazkiak, bideoak, liburuak, estekak...